Accident : जेजुरीजवळ दौंडज खिंडीत अपघात : एका वारकऱ्यांचा मृत्यू, तर तिघेजण जखमी
प्रतिनिधी (महाराष्ट्र ऑनलाईन न्युज): कार्तिकी वारीसाठी पंढरपूरहून आळंदीकडे श्री पांडुरंग व संत नामदेव महाराज पालखी सोहळा जेजुरी जवळील दौंडज खिंडीतून मार्गस्थ होताना पहाटे साडे चार वाजता या वारीतील चार वारकऱ्यांना पीकअप जीपने धडक दिली. या अपघातात एका तरुण वारकऱ्याचा मृत्यू झाला तर तिघे वारकरी गंभीर जखमी झाले आहेत. पंढरपूरहून आळंदीकडे वारकरी दिंडी जात होती. पहाटे साडे चार वाजता दौंडज खिंडीत काही वारकरी टँकरच्या नळावर हात पाय धुत असताना मागून असलेल्या पीकअप जीप ने चार वारकऱ्यांना धडक दिली.
या अपघातात कृष्णा नागोराव गरुड (वय 23 वर्षे) रा. मटकर आळा ता. जिल्हा परभणी) यांचा जागीच मृत्यू झाला तर सिधेशोर प्रभाकर बोबडे (वय 23 वर्षे) रा. बोबडे टाकली ता. जि. परभणी) रितेश राजाराम ब्रम्हे (वय 18 वर्षे) रा. बोबडे टाकली ता. जि. परभणी) , चक्रधर कोपलवर (वय 28 वर्षे) रा. साडेगाव ता. जि. परभणी) हे तिघे जखमी झाले आहेत. या जखमी रुग्णांना उपचारासाठी ससून रुग्णालय पुणे येथे दाखल केले आहे.
पीकअप चालकास पोलिसांनी अटक केली असून जेजुरी पोलीस स्टेशनचे पोलीस निरीक्षक बापूसाहेब सांडभोर या प्रकरणी तपास करीत आहेत.
